Газрын тосны үнэ 2022 оноос хойш анх удаа баррель нь 100 доллар давлаа

Өчигдөр, 09:30

Ойрх Дорнод дахь цэргийн мөргөлдөөн эрчимжиж, өдөр бүр зах зээлээс ойролцоогоор 20 сая баррель газрын тос тасалдаж байгаатай холбоотойгоор дэлхийн газрын тосны үнэ баррель нь 100 ам.доллар давлаа. Ийнхүү 2022 оноос хойш анх удаа ийм түвшинд хүрч байна.

Олон улсын жишиг үнэ болох Брэнт төрлийн газрын тос Азийн зах зээлд шинэ долоо хоногийн арилжаа эхлэхэд 16.6 хувиар өсөж, баррель нь 108.10 ам.долларт хүрэв. Ингэснээр Орос Украинд халдсаны дараах үеэс хойш анх удаа нефтийн үнэ огцом өндөр босгыг давлаа.

АНУ-ын газрын тосны жишиг үнэ болох West Texas Intermediate (WTI) мөн огцом өсөж, 19.6 хувиар нэмэгдэн баррель нь 108.72 ам.доллар болсон байна. Урьдчилсан арилжааны мэдээллээс харахад Уолл-стритийн зах зээл даваа гарагт бууралттай нээгдэх төлөвтэй байна.

Газрын тосны үнэ ингэж огцом өссөн нь “АНУ болон дэлхийн аюулгүй байдал, энх тайвны төлөө төлөх маш бага үнэ” гэж АНУ-ын Ерөнхийлөгч Дональд Трамп ням гарагт мэдэгдэв. Тэрээр үүнийг АНУ, Израилийн Ираны эсрэг хийж буй дайны түр зуурын үр дагавар гэж тодорхойлжээ. “Ираны цөмийн аюулыг устгах ажиллагаа дуусмагц нефтийн үнэ түргэн буурна” гэж тэрээр сошиал сүлжээгээр мэдэгдсэн байна.

Ойрх Дорнод дахь мөргөлдөөн амралтын өдрүүдэд улам ширүүссэний дараа нефтийн үнэ ийнхүү өссөн бөгөөд Кувейтийн үндэсний нефтийн компани түүхий тосны олборлолтоо “урьдчилан сэргийлэх зорилгоор” бууруулж байгаагаа мэдэгдсэн юм. Ингэснээр нефтийн үнэ дахин гурван оронтой тоонд хүрч, долоо хоногийн өсөлт нь Ковид-19 цар тахлын үеэс хойших хамгийн өндөр түвшинд хүрээд байна. Зөвхөн өнгөрсөн баасан гарагт л гэхэд АНУ-ын газрын тосны үнэ 10 ам.доллараар нэмэгдсэн байна.

Стратеги, олон улсын судалгааны төвийн ахлах шинжээч Клейтон Сейгл “Зах зээл Трампын засаг захиргаанд өгсөн хүлээлтийн хугацаа өнгөрсөн долоо хоногийн эцсээр дууссан” гэж мэдэгджээ.

Тэрээр “Өдөрт 20 сая баррель газрын тосны дутагдал дэлхийн нефтийн зах зээлийн тэнцвэрт хүчтэй нөлөөлж байгаа бөгөөд нөхцөл байдал сайжрах шинж алга. Харин ч Ерөнхийлөгч Трамп болзолгүй бууж өгөхийг шаардаж байгаа нь бодитой магадлал багатай зүйл. Анх зарим ажиглагчид нефтийн үнийн өсөлтийг үл тоож байгаа нь зүгээр нэг сүрдүүлэг болов уу гэж бодсон байж магадгүй. Харин одоо тийм биш нь тодорхой боллоо” гэж хэлсэн байна.

Ерөнхийдөө энэ оны эхэнд баррель нь 60 ам.доллараас арай дээш байсан нефтийн үнэ одоогоор ойролцоогоор хоёр дахин нэмэгдсэн байна. Оны эхний хоёр сард үнэ өсөж эхэлсэн ч АНУ, Израил Иранд довтолсноос хойш илүү огцом өссөн юм. Энэхүү довтолгоо нь Ойрх Дорнодын нефтийг тээвэрлэдэг стратегийн чухал зам болох Ормузын хоолойгоор дамжих нийлүүлэлтийг тасалдуулжээ.

Дэлхий даяар нефтийн хомсдол үүсэх болгоомжлолыг Катарын эрчим хүчний сайд улам нэмэгдүүлсэн. Тэрээр дайны нөхцөл байдал үргэлжилбэл Персийн булангийн бүх эрчим хүч экспортлогч орнууд хэдхэн долоо хоногийн дотор олборлолтоо зогсоохоос өөр аргагүй болж, нефтийн үнэ баррель нь 150 ам.долларт хүрч болзошгүй гэж анхааруулсан байна.

Саудын Араб, Арабын Нэгдсэн Эмират Улс, Кувейт зэрэг орнуудын нефтийн агуулахууд багтаамжийнхаа дээд хязгаарт хүрч байгаа тул хэрэв нефтийг Ормузын хоолойгоор дамжуулан экспортлох боломжгүй бол томоохон ордуудыг хаах шаардлагатай болж магадгүй байна.

Дэлхийн газрын тос болон шингэрүүлсэн байгалийн хийн нийлүүлэлтийн ойролцоогоор тавны нэг нь дамжин өнгөрдөг энэ хоолойгоор явахыг оролдож байсан зуу зуун танкер Ираны Хувьсгалт гвардийн хүчнээс “энэ замыг ашигласан ямар ч хөлгийг шатаана” хэмээн сүрдүүлсний дараа зогсонги байдалд оржээ.

Сейглийн үзэж байгаагаар Ойрх Дорнодоос нефть, хий экспортлох ажиллагаа хөлөг онгоцны эзэмшигчид, операторууд болон даатгалын компаниуд Ираны байлдааны усан онгоц, нисэх онгоц, пуужин, дрон, хурдны завь, тэнгисийн мина зэрэг аюулаас хангалттай хамгаалагдсан гэж үзэх хүртэл хэвийн болохгүй аж.

Цагаан ордон нөхцөл байдлыг зохицуулахын тулд Саудын нефтийг Улаан тэнгисээр дамжуулах, АНУ-ын стратегийн нефтийн нөөцийг ашиглах, эсвэл тээврийн компаниудад төрийн баталгаатай даатгал олгох зэрэг арга хэмжээг санал болгожээ. Гэсэн ч Сейглийн хэлснээр эдгээр арга хэмжээ нь өдөр бүр зах зээлээс алга болж буй 20 сая баррель нефтийн алдагдлыг нөхөхөд хангалтгүй юм.

https://itoim.mn/a/2026/03/09/world/otc?5e6fa6c3a0a1af436c08a8db7461ae9b

Сэтгэгдэл

АНХААРУУЛГА: Уншигчдын бичсэн сэтгэгдэлд Bulgan.nutag.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.