Дэлхийн шилдэг баритон дуучин Э.Амартүвшин АНУ, Италид тоглоно
Ардын жүжигчин, дэлхийн шилдэг баритон дуучин Э.Амартүвшин Америкийн Сан Франциско дуурийн театрт улирлын тоглолтын нээлтээ хийх гэж байна. Тэрбээр 2025 оны есдүгээр сарын 5, 10, 13, 16, 19, 21, 24, 27-нд алдарт "Риголетто" дуурьт тоглох бол Италийн алдарт Ла Скала театрт аравдугаар сарын 7, 10, 13, 16, 22, 25, 28-нд "Риголетто" дуурийн гол дүрд тоглох гэнэ. Алдартай дуурьд хувийн ашиг сонирхлын төлөө эрх мэдэлд улайран шунах нь хүний сэтгэл зүй, амь насанд хичнээн хор уршигтайг харуулна.
Тэрбээр 2011 онд 25 насандаа Монгол Улсын Гавьяат жүжигчин цолыг хүртсэн бол 2022 онд Ерөнхийлөгчийн зарлигаар Ардын жүжигчин цол хүртэж байв.
Тэрбээр 2004-2009 онд Соёл урлагийн их сургуулийг Гавьяат жүжигчин Ц.Ерөө багшийн удирдлага дор суралцаж төгссөн бөгөөд 2009 оноос сонгодог урлагийн гараагаа Дуурь, бүжгийн эрдмийн театраас эхэлж байжээ. Энэ хугацаанд дэлхийн томоохон сонгодог урлагийн уралдаан тэмцээнүүдээс дараах шагналуудыг хүртэж байв.
- 2011 онд П.И.Чайковскийн нэрэмжит ОУ-ын XIV уралдаан /Санкт-Петербург, ОХУ/, II байр мөн үзэгчдийн нэрэмжит шагнал,
- 2012 онд Плачидо Домингогийн ОУ-ын дуурийн дуучдын уралдаан /Бээжин, БНХАУ/, I байр,
- 2013 онд Франциско Винасын нэрэмжит 50 дахь ОУ-ын уралдаан /Барселон, Испани/, II байр, Оросын хөгжмийн зохиолчдын бүтээлийн шилдэг дуучин мөн «Associacio d’Amics de l’Opera deSebadell»-ийн тусгай шагнал,
- 2015 онд «BBC Cardiff Singer of the World» тэмцээн, үзэгчдийн нэрэмжит шагнал,
- 2016 онд «Seoul International Music Competition»-д III байрыг тус тус эзэлсэн.